ఈ వేసవిలో మొదటి మామిడిపండు తిన్నానోచ్ ....!!!

                   ఏదో మామిడి పండు తిన్న ఆనందం. ఆనందాన్ని పది మందితో పంచుకుందాం అని ఇలా ఈ టపా....  

                
            పిడుగురాళ్ళలో జన్మభూమి ఎక్కిన నేను తెనాలిలో భోజనం చేద్దామని అనుకున్నాను. కానీ ఆకలి వేయక పోవడం వలన ఆ ప్రయత్నాన్ని విరమించుకొని అటుగా వచ్చిన సంగం డెయిరీ వారి మజ్జిగ ప్యాకెట్లతో  మ.. మ.. అనిపించేసాను. కానీ ఏలూరు చేరుకునే సరికి జీవుడు విలవిల లాడాడు. ఇంకో రెండు గంటలే కదా అని సరి పెట్టుకుని 4 గంటలకు రాజమండ్రిలో దిగి అత్తారింటికి వెళ్దామని షేర్ ఆటో ఎక్కాను. ఎక్కేటప్పుడు రాజా థియేటర్ దగ్గరకు వెళ్తుందని చెప్పిన ఆటో అన్న కంబాల చెరువు దగ్గరకు రాగానే మాంచి బేరం ఒకటి తగిలేసరికి అక్కడే దించేసి వెళ్లి పోయాడు.
           దీంతో చేసేది ఏమీ లేక కంబాల చెరువు జంక్షన్లో ఇంకో ఆటో కోసం ఆకలి కళ్ళతో ఎదురు చూస్తుంటే అటుగా వచ్చిన మామిడి పండ్ల సైకిల్ని చూసి ఆపుకోలేక ఎంతన్నా... అని ఒక మాట పడేసాను. అసలే గోదావరి నీళ్ళ ప్రభావమో ఏమో గాని గోదావరి జిల్లా వాసులకు మాటలు పెదాల  మీదే ఉంటాయి. ఇప్పుడే మగ్గ పెట్టి తీసుకు వస్తున్నానండీ ... ఆయ్. ఒక్క సారి తింటే మళ్ళీ మళ్ళీ తినాలనిపించేత్తదండి... పాతిక తీసుకుంటారా , పరక సరిపోద్దా అండి... అని ఒక్క  సారిగా  మాటలు మొదలెట్టాడు. అసలే ఆకలి కడుపుతో ఉన్న నేను పరక అంటే ఎన్ని కాయలు వస్తాయండి అని ఒక మాట అడిగి వాడికి 100 రూపాయలు ఇచ్చి 13 కాయలు సంచిలో వేసుకుని అత్తారింటికెళ్లి కాయకోసి పెట్టమని అడిగా. సీజన్లో తొలి కాయ కదా అని పరమపదించిన పెద్దల చిత్ర పటాల ముందు ఒక్కో కాయ ఉంచి తర్వాత నాకు కోసి పెట్టడం తో ఈ సీజన్లో తొలి మామిడి కాయ తిన్నట్లయింది. 
         మీకు కూడా మామిడి పండ్లు కావాలంటే చెప్పండి... పార్సిల్ చేసి పంపిస్తా... !!!

జలాంతర్గత కేబుల్స్ తెగిపోయాయా లేక రెండు సైబర్ దిగ్గజాల మధ్య యుద్ధమా ...??? ఇంటర్నెట్ వేగం తగ్గడానికి కారణం ఏమిటి...???

                  గత నాలుగైదు రోజులుగా మీ ఇంట్లో లేక మీ మొబైల్ లో ఇంటర్నెట్ మరీ స్లోగా  ఉందా...???   ఫేస్ బుక్ లాంటి కొన్ని వెబ్ సైట్స్ తెరుచుకోవడానికి మరీ ఎక్కువ సమయం పడుతుందా ...??? హారం , కూడలి కూడా సమయం తీసుకుంటున్నాయా ...??? డౌన్ లోడ్ వేగం బాగా తగ్గి పోయిందా ...??? అయితే మీ మదిలో మెదులుతున్న ప్రశ్నలకు సమాధానం ఇదే కావచ్చు. 

                అసలు విషయానికి వస్తే ఈజిప్టు సముద్ర జలాలలో గల సముద్ర గర్భ కేబుల్స్ కొన్ని రోజుల క్రిందట తెగి పోయాయట . దీని వలన భారత దేశం తో పాటు మిడిల్ ఈస్ట్ , దక్షిణాఫ్రికా వంటి దేశాల ఇంటర్నెట్ సేవల మీద బాగా ప్రభావం పడింది. ఈ తెగి పోయిన కేబుల్స్ లో South East Asia -Middle East -Western Europe 4 (SMW 4), India -Middle East -Western Europe (I -ME -WE ) మరియు Europe India  gateway (EIG )కి సంబంధించిన కేబుల్స్ ఉన్నాయి. ఈ సమస్యను చక్కదిద్దడానికి ఆ ప్రాంతంలో జలాంతర్గత కేబుల్స్ ని పర్యవేక్షించే ఇంటర్నేషనల్ కన్సార్టియం అఫ్ ఆపరేషన్స్ ప్రయత్నం చేస్తుంది . 

                 అయితే జరుగుతున్న పరిణామాలకు వేరే కారణాలు ఉన్నాయని కొంతమంది అంటున్నారు . ఈ పరిస్థితి కి గల కారణాన్ని రెండు సైబర్ దిగ్గజాల మధ్య జరుగుతున్న పోరు గా అభివర్ణిస్తున్నారు . ఏది ఏమయినా ఈ పరిస్థితి వలన భారత దేశం లోని అధిక భాగం ప్రజలు ఇబ్బందులు ఎదుర్కొంటున్నారు . 

                ఇక టెలికం సంస్థల విషయానికి వస్తే BSNL మరియు Airtel వంటి సంస్థల మీద ఈ ప్రభావం బాగా పడిందని ఎకనామిక్ టుడే పత్రిక పేర్కొంది . అయితే ఎయిర్టెల్ తన డేటా ట్రాఫిక్ ని మరో మార్గం గుండా తరలిద్దామని నిర్ణయించుకుంది. Vodafone , MTNL  వంటి సంస్థల మీద కూడా ఈ ప్రభావం పడింది . ప్రస్తుతం సెలవులు కావడం వలన డేటా వాడకం అంతగా లేదని , సోమ వారానికి ఈ సమస్య మరింత తీవ్రం కావచ్చని , ఈ సమస్య పరిష్కారం కావడానికి మరొక 3 నుంచి 4 వారాల సమయం పట్ట వచ్చని Indian ISP Association President రాజేష్ చారియా గారు చెప్పారు . 

మీరు కూడా ఈ సమస్యను ఎదుర్కొంటున్నట్లయితే  మీ అనుభవాలను కామెంట్ల రూపంలో పంచుకోండి ... !!!

మీ మొబైల్ నెంబరు DND స్టేటస్ ని ఉచితము గా తెలుసుకోవడానికి ఇక్కడ నొక్కండి... Check your mobile number DND status here...

                    అవాంఛిత కాల్స్ ని, మెసేజ్ లను నిరోధించడానికి 1909  కి ఫోన్ చేసి నమోదు చేయించు కోవాలని మనందరికీ తెలిసే ఉంటుంది. అయితే అసలు మన నెంబరు రిజిస్టరు అయినదో  లేదో  తెలుసుకోవడానికి ప్రస్తుతము  ఒక సులభమయిన మార్గం ఉంది 

 click here to check DND status of your mobile. This is official website of TRAI.    http://www.nccptrai.gov.in/nccpregistry/search.misc

BSNL....Bad Signal No Lines...మూడు నెలల bsnl "నేస్తం" తో నా అనుభవాలు .... Dont miss it ....

                      BSNL ని కించపరచాలనే ఉద్దేశ్యం కాదు కానీ, వినియోగదారులు ఎదుర్కొంటున్న సమస్యల పట్ల ఆ సంస్థ అధికారులు ప్రవర్తిస్తున్న తీరుకి వొళ్ళు మండి ఈ టపా రాస్తున్నాను.

                     ఆ మధ్య BSNL ల్యాండ్ ఫోన్ ఉన్న వారికి బంధం పేరుతో ఉచిత సిమ్ కార్డు ఇచ్చేవారు. ఆ విధంగా మా ఇంట్లో ఉన్న ల్యాండ్ ఫోన్ పేరు మీద తొలిసారిగా BSNL GSM సిమ్ ని తీసుకున్నాం. మొదట్లో బంధం సిమ్ నుంచి ల్యాండ్ ఫోన్ కి అపరిమిత ఉచిత నిముషాలు మాట్లాడుకునే అవకాశం  ఉండేది. అత్తా కోడళ్ళ మధ్య ఖర్చు లేకుండా మాట్లాడుకునే అవకాశం  రావడంతో ఆ సిమ్ ని మా ఆవిడ తీసుకుని వాడటం మొదలు పెట్టింది. ఇంతవరకు బాగానే ఉంది.ఖర్చుని ఇంకాస్త తగ్గిద్దాం అన్న ఆశతో గత 9 సంవత్సరాలుగా వోడాఫోన్ వాడుతున్న నామీద మా ఆవిడ కన్ను పడింది.ఇంకేముంది, BSNL కి మారిపోయి నేస్తం ప్లాన్ తీసుకోండి...10 పైసలకే మాట్లాడుకోవాచు అని పోరు మొదలు పెట్టింది. సరే అని ఒకానొక దుర్ముహూర్తం లో MOBILE NUMBER PORTABILITY కి దరఖాస్తు చేసుకుని BSNL లోకి మారిపోయా. ముహూర్త బలమో ఏమో కాని, నా కష్టాలు మొదలవడానికి ఎంతో సమయం పట్టలేదు. 
నాకు ఎదురయిన అనుభవాలలో కొన్ని....

• నేను సన్నద్ధమవుతున్న పరీక్షకు సంబంధించి ఒక కాల్ వచ్చింది. ఒక్కనిముషం మాట్లాడే లోపే కాల్ కట్....!!!!
• సాయంత్రం 6 దాటినతర్వాత ఫోన్ కలిసిందంటే టీవీ లో మన అభిమాన హీరో లైవ్ ప్రోగ్రాం కి కాల్ కలిసినంత ఆనందం ....!!!
• కాల్ మధ్యలో హలో...హలో... అని అనకుండా మాట్లాడటం అసంభవం.

                ఇన్ని సమస్యలతో నెల తిరిగే లోపే ఫోన్ చేయాలన్న...అవతలి వారి ఫోన్ ఎత్తాలన్నా చిరాకు మొదలయింది. పోనీ sms లతో నెట్టుకోద్దాం అనుకున్న నాకు అక్కడ కూడా కష్టాలు తప్పలేదు. మా ఫ్రెండ్ కి WHERE ARE YOU ? అని SMS చేసిన పాపానికి వాడు నా మీద అంతెత్తున లేచాడు. తప్పు వాడిది కాదులెండి. వాడి మానాన వాడు patients ని చూసుకుంటున్నాడు . నేను ఒక్క సారి పంపిన where are you ? అన్న సందేశం BSNL వారి మహిమతో వాడికి మూడు సార్లు వెళ్ళింది. అత్యవసరమేమో అని వాడు ఫోన్ చేయడం, ఊరికే అని నేను , ఊరికే  అయితే మూడుసార్లు ఎందుకు మెసేజ్ చేశావా అని వాడు...ఇలా.... మధ్యలో as usual గా కాల్ కట్ అవడంతో బతికిపోయాను అనుకోండి....!!!

            ఇలా రెండు నెలలు భరించిన నేను signal problem మీద complaint  ఇద్దాం అని customer care కి ఫోన్ చేసినా ... స్థానిక BSNL కార్యాలయానికి వెళ్ళినా...online portal లో complaint చేసినా....దున్నపోతు మీద వాన కురిసినట్టు సిగ్నల్ సమస్య మాత్రం తీరలేదు. ఈ లోపు మూడు నెలలు నిండిపోయాయి .(ఒక సారి పోర్ట్ అయిన తరువాత మళ్లీ పోర్ట్ అవ్వాలంటే మూడు నెలలు ఆగాలి అనే నిబంధన ఉంది) మళ్లీ porting request పెట్టుకుని vodafone కి వెళ్ళడంతో BSNL తో నా మూడు నెలల నేస్తం ముగిసింది. అత్తా కోడళ్ళు కూడా రెండు Reliance CDMA (less radiation, superior voice clarity ) ఫోన్లు కొనుక్కుని కబుర్లు కొనసాగిస్తున్నారు ....